Það er gott að vera í skilum... við Skilum.
Persónuverndarstefna Skilum ehf. veitir upplýsingar um hvernig persónuvernd og trúnaði um persónuupplýsingar er háttað. Ábyrgðaraðili er framkvæmdastjóri Skilum ehf.
PERSÓNUVERNDARSTEFNA SKILUM
Almennt
Persónuverndarstefna þessi tekur til vinnslu á persónuupplýsingum hjá Skilum ehf., kt. 460918-0730, (hér eftir „Skilum“). Skilum er innheimtufyrirtæki í eigu Kviku banka hf. og starfar skv. innheimtulögum nr. 95/2008, á grundvelli starfsleyfis frá Fjármálaeftirliti Seðlabanka Íslands.
Í stefnunni eru veittar upplýsingar um það hvaða persónuupplýsingum Skilum safnar, hvernig þær eru unnar og í hvaða tilgangi, hversu lengi má ætla að upplýsingarnar séu geymdar, hvert þeim kann að vera miðlað og hvernig öryggi þeirra er gætt í starfsemi Skilum.
Skilum er ábyrgðaraðili sérhverra persónuupplýsinga sem Skilum safnar og vinnur og ber því ábyrgð á því að vinnsla persónuupplýsinga sé í samræmi við gildandi persónuverndarlög
Vinnsla Skilum á persónuupplýsingum byggir fyrst og fremst á lagaskyldu sem hvílir á Skilum við innheimtustörf. Að öðru leyti byggir vinnslan á samningi við kröfuhafa, lögmætum hagsmunum eða samþykki greiðanda.
Uppruni persónuupplýsinga
Skilum fær persónuupplýsingar frá kröfuhöfum, fyrirtækjum sem halda utan um vanskilaskrá (t.d. Creditinfo), Þjóðskrá og öðrum opinberum stofnunum, greiðendum, öðrum aðilum að málum eða þriðja aðila vegna meðferðar mála. Kröfuhafar eru sjálfstæðir ábyrgðaraðilar þeirra persónuupplýsinga er þeir láta Skilum í té og bera ábyrgð á réttleika þeirra upplýsinga.
Notkun persónuupplýsinga
Skilum notar persónuupplýsingar fyrst og fremst við þjónustu í þágu greiðenda Skilum í þeim tilgangi að innheimta kröfur. Við innheimtuna er sú þjónusta einkum fólgin í vinnu við framgang innheimtumála, svo sem með rafrænni innheimtu hjá greiðendum, samskiptum við kröfuhafa og greiðendur, viðtöku og skilum á greiðslum og svo framvegis. Í framangreindum tilgangi eru persónuupplýsingar eins og t.d. símanúmer, netföng, heimilisföng eða aðrar tengiliðaupplýsingar notaðar, meðal annars við útsendingu innheimtutilkynninga til greiðenda og annarra samskipta.
Persónuupplýsingar sem unnið er með
Skilum vinnur við með eftirfarandi upplýsingar eftir því sem við á:
* Samskiptaupplýsingar: Nafn, heimilisfang og aðrar samskiptaupplýsingar s.s. eins og netfang og símanúmer.
* Kennitala, skilríki og auðkenni: Kennitölur, skilríki, vegabréf, ökuskírteini og rafræn auðkenni svo Skilum geti borið kennsl á greiðanda.
* Fjárhagsupplýsingar: t.d. viðskiptasaga, upplýsingar um vanskil
* Opinberar upplýsingar: t.d. upplýsingar úr þjóðskrá, fasteignaskrá, bifreiðaskrá, upplýsingar um vanskil.
* Viðkvæmar persónuupplýsingar: Sumar persónuupplýsingar eru flokkaðar sem viðkvæmar í lögum um persónuvernd. Þetta eru t.d. upplýsingar er varða kynþátt eða þjóðernislegan uppruna, stjórnmálaskoðanir, trúarbrögð eða heimspekilega sannfæringu, aðild að verkalýðsfélagi, erfðafræðilegar upplýsingar, lífkennaupplýsingar og heilsufarsupplýsingar. Skilum hvorki safnar þessum persónuupplýsingum né vinnur þær án samþykkis viðskiptamanns nema með sérstakri lagaheimild. Að meginstefnu til varðveitir Skilum ekki viðkvæmar persónuupplýsingar en hins vegar kunna upplýsingar um t.d. heilsufar, að skipta máli við meðferð máls og slíkum upplýsingum þá jafnan miðlað til Skilum frá greiðanda eða aðila á hans vegum. Við þær aðstæður varðveitum við þær upplýsingar með samþykki greiðandans. Slíkt samþykki má draga til baka.
* Kökur: Kökur (e. cookies) eru litlar tölvuskrár sem eru sendar í tölvu eða snjalltæki notanda þegar vefsíða Skilum er heimsótt. Þær vistast í tæki viðkomandi og eru sendar til baka þegar notandi heimsækir vefsíðuna aftur. Nauðsynlegar vefkökur eru ómissandi til að vefsíðan virki eins og ætlast er til og til innskráningar á greiðendavefinn. Aðrar vefkökur eru notaðar til að fylgjast með afköstum og frammistöðu vefsíðunnar og til að merkja sérstaklega hluta vefsíðunnar sem hafa með heimsókn notandans að gera. Þær safna engum upplýsingum sem hægt er að auðkenna notandann með.
Varðveisla persónuupplýsinga
Skilum geymir upplýsingar eins lengi og þörf er á vegna meðferðar mála og í samræmi við kröfur annarra laga eins og lög um tekjuskatt, lög um bókhald og lög um fyrningu kröfuréttinda. Skilum og starfsmenn þess eru bundnir þagnarskyldu um persónuhagi og rekstrar- eða viðskiptamál og um önnur atriði sem þeir fá vitneskju um í innheimtustarfi sínu og leynt skulu fara samkvæmt lögum eða eðli máls. Persónuupplýsingum er eytt um leið og þeirra er ekki þörf lengur.
Miðlun persónuupplýsinga
Skilum kann að vera nauðsynlegt eða skylt að afhenda persónuupplýsingar til þriðja aðila, svo sem opinberra aðila, lögmanna, kröfuhafa eða samstarfsaðila okkar. Þegar afhending upplýsinga er vegna samstarfs við þriðja aðila sem við berum ábyrgð á, fer afhendingin eingöngu fram á grundvelli vinnslusamnings.
Sjálfvirk ákvörðunartaka
Starfsemi Skilum byggir ekki á sjálfvirkri ákvörðunartöku. Skilum nýtir hins vegar sjálfvirka ferla til undirbúnings ákvarðanatöku, sem er þó aldrei sjálfvirk. Þetta hefur því ekki áhrif á réttindi greiðenda eða skyldur.
Réttindi greiðenda
Greiðandi hefur, í tengslum við vinnslu persónuupplýsinga um hann, rétt til að:
* óska eftir upplýsingum um hvernig Skilum vinnur persónuupplýsingarnar og fá afrit þeim upplýsingum;
* óska eftir leiðréttingu á röngum persónuupplýsingum sem Skilum vinnur eða óska eftir að láta fullgera ófullkomnar persónuupplýsingar;
* óska eftir að Skilum takmarki vinnslu persónuupplýsinga í ákveðnum tilvikum, s.s. þegar vinnslu hefur verið andmælt;
* óska eftir því að fá persónuupplýsingarnar á skipulegu, algengu og tölvulesanlegu sniði og fá þær sendar annarri stofnun;
* afturkalla áður veitt samþykki fyrir vinnslu persónuupplýsinga, ef við á. Afturköllun samþykkis hefur ekki áhrif á lögmæti vinnslu á grundvelli samþykkisins fram að afturköllun;
* andmæla vinnslu í þágu beinnar markaðssetningar;
* leggja fram kvörtun hjá Persónuvernd ef viðskiptamaður álítur að vinnsla Skilum á persónuupplýsingunum hans brjóti í bága við gildandi lög. Andmæli viðskiptamaður vinnslu persónuupplýsinga mun Skilum hætta vinnslu persónuupplýsinganna nema Skilum geti sýnt fram á lagaskyldu eða lögmæta hagsmuni sem ganga framar hagsmunum viðskiptamanns.
Samskiptaupplýsingar
Greiðandi getur haft samband við Skilum með öll mál sem tengjast vinnslu á persónuupplýsingum hans og hvernig hann geti neytt réttar síns samkvæmt lögum um persónuvernd. Ef greiðandi hefur spurningar vegna vinnslu persónuupplýsinga eða athugasemdir við stefnu þessa skal beina erindum vegna þess á netfangið personuvernd@skilum.is
Persónuverndarstefna þessi var síðast endurskoðuð í janúar 2026